Posted in غير مصنف

بداية الحلم!

FullSizeRender ‫‬

بدأت تبان معالم الحلم لمن وصلتكم رسالة “لقد تم ترشيحك للقبول على الرغبة التالية السنة التحضيرية مسار الكليات الطبية” !
الفرحة اللي في عيون أهلكم و فخرهم العظيم كانت السعادة الأكبر الحمدلله، اشكروا الله على المكان العظيم اللي سرتو جزء منه، و الله يجعلها بداية خير لتحقيق باقي الحلم..

بدأت روحكم المشبعة بالفرحة تستوعب إنها مقبلة على حِمل عظيم؛ فأول سؤال يخطر ببالكم لما تشوفوا أحد اجتاز التحضيري تسألوه كيف التحضيري ؟ ومهما كان الجواب ما حترتاحو لين ما تجربوها بنفسكم .
تختلف أراء التحضيري وتنحصر إنها سنة ( متعبة ، إنجاز ، تغيير ، سنة تبين قدراتك وتحدد من أنت ، رغم الضغط تبقى ممتعة ، تلهمك الكثيير وتغير مجرى تفكيرك 180 درجة) رأينا ورأي غيرنا مو مهم احكم على الشيء من تجربتك ولا تستهين إذا قالوا لك السنة سهلة!
بس من حقك تفهم أسلوب المادة و تاخذ فكرة تبين لك كيف ممكن تكون طريقة مذاكرتك، و هذه بعض النصايح اللي ممكن انها تفيدكم بإذن الله في مشواركم .

#نصايح مهمة :

اخلصوا نية العلم لله ، و اتوكلوا على الله و اسألوه التوفيق في كل خطوة ، و دايماً خلو أهلكم يدعوا لكم و اكسبوا رضاهم و برّهم ،  و خلو بدايتكم إيجابية و بروح حلوة ؛ لأنو كل ما كانت البدايات حلوة إن شاءالله نهاية التحضيري تبسطكم و تعطيكم أضعاف ما أعطيتوها ، و لو في شي صعب عليكم لا تضعفوا و اتمالكوا نفسكم و كونوا صبورين ، ركزوا في المحاضرات و لا تغيبوا ، لا تخجلوا تسألوا الدكاترة عن أي نقطة ما فهمتوها لمصلحتكم ، فرغوا المحاضرات و حاولوا تطّلعوا عليها عالأقل “أسمعوا لتسجيلات الأولاد لو حسيتو إنها أحسن فرغوها” ، ما في مشكلة لو اشتريتو شروحات و لو ما مشيتو مررة روحو خصوصي لو حابين -كلموا الدكاترة الخصوصيين من بدري لو ناويين-، اشتروا و زاكرو و صمو الاسئلة حقت السنين اللي فاتت صم لأنهم يكرروها مررررة ، افهموا مرة و اتنين و تلاتة من الدكاترة و من صحباتكم و من الشروحات لا تضيّعوا ولا فرصة ممكن تفهموا فيها أكتر!
مهم جداً تقفلوا ادنكم عن كل التجارب السلبية خلو لنفسكم تجربة إيجابية بعيداً عن كل العوائق اللي سمعتوها ، لأنو كل شخص عندو قدرات مختلفة و وجهة نظر غير و تعامل غير ، خدو الكلام الإيجابي من التجارب اللي سمعتوها بس سواء عن الدكاترة أو المواد ، لا تتخوفوا و تسيرو متشائمين قبل لا تجربوا و تحكموا بنفسكم.
ساعدوا بعضكم باللي تقدروا عليه ربّي ما ينسى كل خير تسووه ، سوو الخير فين ما كان و لمين ما كان و في أي وقت كان و في يوم من الأيام رح يرجعلكم أضعاف مضاعفة إن شاءالله ، خلو روحكم طيبة و تحب الخير للناس ، لا تخلو الشيطان يتشطر عليكم و تكونوا أنانيين في أي لحظة!!!
أي معلومة عندكم و تحسو إنها رح تفيد غيركم أنشروها الله يرضى عليكم ، لا تكونوا بخيلين على نفسكم بالأجر و بالدعوات.
كونوا صداقات في التحضيري و اكسبوا قرب النّاس الطبية ، و الله يرزقكم بناس تساعدكم و تكون خير عون ليكم💙
خلو إرادتكم أقوى و خلو لكم دافع دايماً بين عيونكم ، خلو أحلامكم و طموحاتكم و أمنياتكم دايماً قريبة منكم و جوت قلبكم ، عشين تقويكم قبل ما تضعفوا لا سمح الله ، اكتبوا حلمكم أو ارسموه و حطوه في مكان تجي عينكم عليه دايماً زي النوت بوك أو مرايتكم أو محفظتكم ، أو خلفية جوالكم لا إرادياً رح تجيكم طاقة إيجابية.
احلموا احلموا كتير الين ما تحسّو إنو كل أحلامكم سارت حقيقة!
خلوكم اقوى من كل الظروف و السلبيات ، و ايقنوا إنو ربنا ما حطكم في مكان إلا و انتو قدها إن شاءالله ، و انجزوا اتعبوا عشين تفرحوا أضعاف الأضعاف يارب ، و نهايةً أعطوا التحضيري كل جهدكم و كل تركيزكم و رح يعطيكِم أكتر.
الله يجعلها سنة دراسية خفيفة و تعدوها بمعدل عالي إن شاءالله ، و الله ينفعكم و ينفع بيكم ، و ربي يوفقكم و يفتحها عليكم و يسهل لكم كل صعب.

 

و دي الڤيديوهات لطالبات و طلاب السنة التحضيرية الطبية خصوصاً

‏https://m.youtube.com/watch?v=iB2kdD7vj8c
‏https://m.youtube.com/watch?v=S8gyXn_AEno
‏https://m.youtube.com/watch?v=EHhVeX8RkqM

Advertisements

الكاتب:

"جبلنا على العطاء لا الأخذ, وخلقنا لنؤجر لا ننتظر"

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s