Posted in غير مصنف

تساؤلات التحضيري المعتادة

هذه بعض تساؤلات التحضيري المعتادة واللي تجينا بالاسك :

#إصدار البطاقة المصرفية :
تتسوى من رمضان ، بعد رمضان تلاقي زحمة و إذا حتطلع بعد رمضان موعد البطاقة لازم يكون قبل أول مكافأة للشهر الأول وللا حتتأخر عليك المكافأة أنا سويت قبل الدراسة بأسبوع من بنك الرياض واصدروها في نفس اليوم

#اختبار تحديد المستوى :

-حسب نظام العام اتلغى-

#اللقاء التعريفي :
في لقائين سووها لنا ما اذكر اي واحد فيهم اللقاء التعريفي اذكر اماكنها اللي كان بالزاهر ماله داعي بس يدوك كلام تحفيز لو طفشانة روحيه ممكن تتسلي او تطفشي زيادة قالوا لنا انه ضروري و طلع لا مو مهم و ما يحسبوا غيابك، بس حيدوك شهادة لو حضرتي و يقولوا تساعد في أنشطة مهارات التعلم و للأسف كمان ما ساعدتنا، و اللقاء الثاني كان في قاعة الملك عبد العزيز لو فاضية مو مشكلة احضري في فقرات متنوعة و إذا عندك أي سؤال تسأليهم .

#قروب الدفعة على الفيسبوك :

https://www.facebook.com/groups/1063609190354231/

#إصدار البطاقة الجامعية :
مواعيد إصدارها تنزل في موقع الجامعة ، حضروا معكم صورة من بطاقة الهوية و يفضل الأصل كمان و صورة لك و ورقة إفادة انتظام (إذا مو عارفين من فين تطلعوا ورقة الإفادة، حتروحوا من صفحتكم عالخدمات الإلكترونية منها عالبوابة الأكاديمية أول خانة عاليسار من ضمن القوائم مكتوب نماذج اضغطوت عليه بعدين اختاروا إفادة انتظام و اطبعوا الورقة هذه الورقة مهمة حتى لو اتأخرتوا تطلعوا بطاقة الجامعة تكون بديل لها عبال تطلعوها ) – لا توتروا نفسكم وتخافوا عشان بطاقة في ناس طلعوها أول يوم في الدراسة.

#أفضل برامج أو مواقع للترجمة :
طبعاً ماشاءالله يا كتر البرامج و المواقع لكن بالنسبة ليا اللي حسيت إنّهم الأفضل
almaany.com english dictionary
موجود كابلكيشن لكن الموقع أفضل ، يطلع لكم معنى الكلمة من نواحي كتيرة زي الطبية العامة القانونية التقنية العسكرية الخ …
يعني يعطيكم معاني كتيرة و رح تشوفو أصح الأصح فيهم و اللي تناسب سياق الجملة🏼
و ابلكيشن
dict – english dictionary
جداً كويس لأنو يعطيكم تعريف للكلمة و يطلع لكم صورة تدل على الكلمة و تقدروا تسمعوا نطق الكلمة و يعطيكم أمثلة مستخدمة فيها الكلمة ، و يقلكم نوع الكلمة سواء كانت اسم أو فعل الخ …
“أنا كنت أستخدم الأبلكيشن من إنجلش لإنجلش و كان أفضل في إني أفهم معنى الكلمة من التعريف و دي طريقة جداً كويسه في إنّكم تحسنوا مستواكم في الإنجلش ، و في برضو من إنجلش لعربي لكن نادراً أستخدمو” زي مثلا Merriam -Webster يجيب لك الكلمة بتعريفها فممرة ما شاء الله كويس خصوصا في مادة النيرسنق الترم الثاني .

#الترجمة تاخد مني وقت طويل ؟ :

في البداية الترجمة رح تاخد من وقتك صح ، لكن الشي اللي ممكن يخليكي تقللي من دا الوقت انك تترجمي المحاضرة اول بأوّل يعني لا تخلي الترجمة تتراكم ابداً ابداً ، و بعدها بفترة رح تحسي انو الترجمة سارت تاخد وقت اقل لانك الريدي ترجمتي كلمات كتير من قبل و عارفة معناها ، فضروري لمن تترجمي تركزي عالكلمة و تحاولي تحطيها في جملة او تكتبي شرح بسيط ليها يعني أهم شي لا تترجمي بدون وعي ، لأنو منجد الترجمة رح تثبت فهمك في كل مرة تتكرر فيها الكلمة ، و عموماً لمن أحد يترجم لك الكلمة ما رح تثبت في مخّك زي لمن انتِ تترجميها و تحاولي توصلي للمعنى الأصح ، و ترى إنّك تترجمي و لو كلمة شي مرّة طبيعي و مستمر لأنو كل يوم تمر علينا كلمات جديدة و تزيد كمّية المعرفة و العلم عندنا ، و تدريجياً رح تقل كمية الكلمات اللي تترجميها ، اصبري و اتعبي و اجتهدي و إن شاءالله كل اللي بتسويه ما رح يضيع و منجد رح يفيدك!

#احتاج لمدرسين خصوصيين؟ :
أول حاجة في ناس ماشاءالله ما احتاجت دكاترة مرّة ، يعني مو بالضرورة ما تروحو عند دكاترة يعني درجات منخفضة او العكس تروحو للدكاترة يعني دايماً درجات عالية ، لازم تتوكلوا على الله و فكل الحالات تجتهدوا قد ما تقدروا و تتعبو على نفسكم كتييير يعني كلو يعتمد عليكم ،
فما نختلف انو في اختلافات أو فروقات شخصية من ناحية الفهم و الاستيعاب، و مو عيب أبداً إنك تقولي أبغى خصوصي طول ما انتِ ما بتعتمدي اعتماد كلي على الدكتور الخصوصي، فانتِ بتتعبي و تجاهدي و بتحاولي إنك تستقبلي المعلومات على أكمل وجه، و في أحسن صورة تساعدك على الاستيعاب و الفهم و الحفظ, 
و طبعاً ما أقدر أحدد لو تحتاجي أو لا، لكن أقلك خلي الترم يبدأ على خير إن شاءالله و تشوفي طبيعة المواد و طبيعة تدريس الدكاترة و وقتها تحكمي لو تحتاجي أو لا، و ممكن كمان تكوني فاهمة لكن تحسي إنك تحتاجي تفهمي زيادة و تحتاجي حاجة تثبت لك المعلومة اكتر، أو حاجة ترتب لك المعلومة فما فيها مشكلة تاخدي عند خصوصي سواء أوراق أو ڤويس أو فيس تو فيس و أكيد كل شخص على حسب اللي يرتحلو..
و ممكن في مواد تحتاجي فيها خصوصي لجزئيات معينة يعني مو كل المادة.

و ممكن تفهمي كل المادة و تحبي طريقة تدريس دكتور المادة و ما تحتاجي خصوصي.
و ممكن في أشياء صعبة عليكِ و تحتاج تركيز و صحباتك فاهمينها فممكن تسأليهم و تتناقشوا و تتساعدوا.
فكل دي الأشياء تعتمد عليكِ انتِ تحدديها لمن نبدأ دراسة على خير إن شاءالله!

#من فين اشتري التجميعات؟ :
أهم مكتبة لكم مكتبة الشاعر مذكرات و تجميعات السنين اللي فاتت موجودة فيها لو بتسألي عن طريقها حقولك و أنت جية العوالي تلقين لوحة مكتوب عليها شارع ابراهيم الجفالي تروحين يمين بعد
متر تقريبا تلقين المكتبة يمينها 

#احتاج أرجع للمراجع في المذاكرة ؟ :
ممرررة لا ، بدري عليها .

#ساعات المواد و تأثيرها على المعدل :
ببساطة كل ما زادت ساعات المادة زادت نقاطها و زاد تأثيرها على المعدل ، يعني الترم الأول مثلاً الإنجلش ب٦ ساعات حاولوا تركزوا عليه مرة لأنو نقاطو كتيرة

#التقديرات :
التقديرات أهم من الدرجات مثلا وحدة جابت 100 والثانية 95 كلهم مثل بعض وتقديرهم أ+
#طريقة حساب معدل الترم :
حساب المعدل يكون نقاط الترم الأول قسمة ساعات الترم الأول .
طريقة حساب نقاط المواد حتقول مثلا الانجليزي عليه 6 ساعات والدرجة الكلية A+ =4 يعني الانجليزي عليه من المعدل 4×6 يساوي24 قيس عليها باقي المواد أخيرا بعد جمع درجة كل مادة حيساوي60 ، يعني نقاط الترم الأول تساوي 60
وضحت ساعات كل مادة في المعدل (ضمن قسم نبذة المادة) عموما مجموع ساعات الترم الأول =15 ،
لو جبت A حتساوي 3.75 ، والB+ =3.5 الخ للتوضيح أكثر https://uqu.edu.sa/page/ar/702#
أو ببساطة ممكن حساب المعدل هِنا http://www.qu.edu.sa/gpa.aspx
طريقة حساب معدل الترمين :
مجموع نقاط الترمين قسمة مجموع ساعات الترمين >للتنبية مجموع نقاط ترمين مو مجموع المعدلين .
أو ببساطة ممكن حساب المعدل هِنا http://www.qu.edu.sa/gpa.aspx
حساب موزونة التحضيري للتسكين “للتخصص” :
على سنتنا حسبناها بهالطريقة /
15× معدل التحضيري
+
0.4 × الموزونة اللي دخلتك الجامعة
#النقل بين القروبات :
ما تلاقي صعوبة لو عذرك قوي زي إن مواعيد خروجك متأخرة و بيتك في جدة أو لو مجموعة بنات باصك مو في قروبك.

 

#ايش نلبس؟ :

سكرب بدرجات الأزرق أو تنورة و بلوزة و “المهم” لاب كوت.

#محلات الاسكرب في مكة و جدة : 

ملاحظة : الاسكرب كانوا يشترطوا اللون الأزرق للبنات مدري عن هذه السنة و الأولاد يفضل ما يلبسوا (:
#مكة 
السويدي مقابل الاسكان على الطريق العام و له فرع في العزيزيه قبل أسواق السلام من محل رد تاق تاخذي يمين بعدين أول لفة يسار بعدين خذي يمين تلقي المحل يسارك
فيه محلين بالشرايع لامي و واحد ثاني نسيته
الثوب السعودي في كذا مكان و بنظري ما أنصح البنات يشتروا منه 
اللباس الصحي في الشوقية
‎@AllebassAlsseh
لامي في الشرايع
المتجر الطبي في الشوقية 
9nine colors في الستين جنب مستشفى الرفيع
+
#جدة
لامي
المظهر الطبي
زي
السويدي
modico moderno.

#أرقام باصات :

0541131609
0507979065

 
#مكافأة التفوق :
تسمى مكافأة تفوق أو امتياز
 IMG_7439
Advertisements

الكاتب:

"جبلنا على العطاء لا الأخذ, وخلقنا لنؤجر لا ننتظر"

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s